Nangangkong kanhi sundalo nakuhaa’g armalite

CEBU, Philippines - Nasikop sa kapolisan ang usa ka lalaki nga nangangkon nga kanhi sundalo apan gidudahan nga usa ka gunrunner human nasigpatan nga migimaw ang sumbohan sa usa ka M-16 armalite rifle nga gisulod niini sa iyang bag pasado alas-9 sa miaging gabii sa barangay Cogon dakbayan sa Danao.  Ang nasikop naila nga si Simala Morohombsar, 43, molupyo sa Certiza Compound, PGBI, Housing, Purok 2, Luzon Avenue, Quezon City.

Sumala pa ni Chief Inspector Rene Kyamko sa Criminal And Investigation Detection Group 7 nga padulong unta sila nga mag-serve og warrant sa dakbayan sa Danao sa usa ka pinangita sa balaod. Apan ilang nasigpatan ang maong suspetsado nga nagdala og bag nga pula nga may miguho nga sumbohan sa usa ka armas sa iyang bag. Tungod niini, ilaha kining gisita apan matud pa misuway kini sa pagdagan apan nasikop gihapon kini.

“Padulong sa iyang awto, naglakaw mi kay barangay road man na, walay resistance pero miaksyon siya og dagan,” matud pa ni Kyamko.

Sumala ni Kyamko nga dihang gisusi nila ang sulod sa bag niini didto na nila nakita ang usa ka M16 Rifle nga may magazine nga may upat ka bala sa M16. Nakuhaan usab ang suspetsado ug usa ka .9mm nga pistola, usa ka magazine nga may lima ka bala ug tulo ka .9mm nga Black Widow nga revolver.

Wala makapresentar ang suspetsado og mga papeles sa maong mga armas hinungdan nga gidala nila kini sa buhatan sa CIDG 7 sa Camp Sotero Cabahug sa dakbayan sa Sugbo.

Sumala pa ni Kyamko nga didto sa Danao gi-assemble ang maong mga armas apan iya pang gi-request ang PNP Crime Lab 7 sa pagsusi sa maong mga armas. 

Susihon sab ni Kyamko kung unsa ka tinuod nga ang suspetsado sakop sa Armed Forces of the Philippines nga maoy pangangkon niini.

Matud pa ni Kyamko nga sa ilang pagsukit-sukit sa suspetsado miangkon kini nga pinalit niya ang maong mga armas ug ibaligyaay ra pud niya kini. Ang maong suspetsado mag-atubang sa kaso nga kalapasan sa RA 8294 as amended by 10591 or Comprehensive Firearms and Ammunition Regulation Act. (BANAT NEWS)