Osmeña Blvd.duol sa Basilica di na gyud paagia’g sakyanan

CEBU, Philippines - Ang kadagkuan sa Basilica Minore Del Sto. Niño misuporta sa ordinansa ni Bise Mayor Edgardo Labella, aron himuong “pedestrianized street” ang parte sa Osmeña blvd.

Sumala ni Basilica Rector Fr. Jonas Mejares nga kun masira na ang portion sa Osmeña Blvd. malikayan na usab ang pag-agi sa mga sakyanan nga makadaot sa estruktura sa karaang  simbahan.

 Si Architect Melva Rodriguez-Java mi-esplikar ngadto sa konseho nga ang abog gikan sa tambutso ug vibration gikan sa mga sakyanan maka-deteriorate sa pundasyon sa Basilica.

Gitataw ni Java nga di “total closure” sa dalan ang ipatuman apan saktong regulasyon sa mga sakyanan.

“Heavy trucks are prohibited however light trucks are allowed,” matud pa ni Java.

Matud ni Java nga aron ma protektahan ug mapreserbar ang simbahan, kinahanglan himuan kini og buffer zone.

Apan ang kapitan sa barangay Sto. Niño nga si Pancho Ramirez Sr. misupak niini. Matud ni Ramirez nga nahugno ang kampana sa simbahan gumikan sa 7.2 magnitude nga linog ug dili sa mga busina ug abog sa mga sakyanan.

“Kung i-close daghan ang maapektuhan, mao nga ang konseho sa barangay dili usab uyon niini,” matud ni Ramirez kagahapon sa public hearing sa session hall.

Matud usab ni CITOM executive director Atty. Rafael Yap nga ang pagsira sa dalan di “proper response” aron mapreserba ang century-old nga simbahan. (BANAT NEWS)