CEBU, Philippines - Usa ang angol ug mikabat sa unom ka balay ang naugdaw ug duha ang nakan-an sa kayo sa sunog nga miulbo didto sa sitio Riles, barangay Tungkop, lungsod sa Minglanilla sa ala 1:30 sa hapon sa miaging adlaw.
Nadawat sa kabomberohan ang alarma sa 1:30 sa hapon ug nakontrolar human sa 10 minutos.
Giila ni FO1 Fulbert Navarro sa Minglanilla Fire Station ang mga nasunogan og balay nga mao sila si Antonio P. Locsin, Lorna Dimaclid, Janil L. Uy, Arlene A. Dimaclid, Conchita Toquera, Darwin Zafra, Elaine Zafra, Ronald Tabura, Michael Cañete ug Aurelia Villasencio.
Matud pa ni Navarro nga dali rang nasunog ang maong mga balay tungod kay mga gaan nga materyales ang mga dapat niini.
Samtang giila usab ni FO1 Navarro ang naangol nga si Mario Paradero, kinsa misuway og tabang sa mga bombero sa pagpalong sa kayo. Gibanabana usab ni Navarro nga mokabat sa P100,000 ang danyos sa maong sunog
Mitabang og pawong sa maong sunog ang mga bombero sa Naga Fire Station.
Miingon si Navarro nga hingpit nga napawong ang maong sunog sa alas 2:30 sa hapon.
Samtang giimbistigar karon sa mga bombero ang nakita nila nga portable gas stove aron pagtino kun dili ba kini maoy hinungdan sa maong sunog. (BANAT NEWS)