Karneng manok sa China di pasudlon nganhi sa nasud

CEBU, Philippines - Higpit nga  gidili  sa kagamhanan   ang pagpasulod og mga karne sa manok, piso, itlog ug mga langgam  nga  ihalas gikan  sa China tungod sa hulga sa bird flu.

Si  Elvira Bongosa  sa  Phil. Information Agency (PIA)7 mipahibawo  nga si  Sec.  Proceso Alcala  sa Department  of Agriculture (DA) mihimo  sa  maong  pagdili human makonpirmar  ang paghugpa sa Highly Pathogenic Avian Influenza (HPAI) virus nga usa  ka subtype sa H5N2 virus, didto  sa probinsiya sa Hebei sa China.

Matud  pa  ni  Bongosa  nga lakip nga  gidid-an  mao  ang  mga  pasaherong magdala og langgam, pato, manok ug uban pang poultry products.

Tungod sa gipatuman nga ban,  si Bongosa  nagkanayon  nga gimando  ni Alcala ang suspensyon sa paghikay  bahin  sa  mga  papeles  sa  mga  kargamentong  karne  ug  uban  pa.

Gipadayag  ni  Bongosa nga  ang pagluwat  og warning kalabot  niini, ug  ang pagkumpiska sa mga barkong adunay kargang susama sa mga nahisgotang produkto gikan sa China  ipatuman  usab, gawas sa mga heat-treated products o  mga  produkto  nga  gipaagi  sa init.

Midugang  si  Bongosa  nga gialerto na usab karon sa DA ang tanan nilang veterinary quarantine officers ug inspector sa tanang pantalan sa nasud kalabot niini.  Hinuon  miingon  si  Bongosa  nga  gitataw ni Alcala nga "bird-flu free" pa gihapon ang Pilipinas.

Iyang gipasabot nga dili magkulang ang suplay sa manok sa nasud tungod kay mayoridad  niini gikan man  sa Amerika ug Canada nga walay kaso sa bird flu virus. (BANAT NEWS)