Capitol maoy paayohon sa Liberation Park
CEBU, Philippines - Ang konseho sa dakbayan sa Talisay miawhag kagahapon sa kagamhanan sa probinsiya nga ipaayo ang Liberation Park o sa Landing Shrine nga nahimutang sa barangay Poblacion.
Si Talisay City councilor Danny Caballero nagkanayon nga ang nahisgutang shrine naguba ug dili na luwas sa kabataan nga mosuroy sa maong lugar.
Ang Liberation Park gideklara isip national historical shrine isip timaan sa gidunggoan sa mga sundawong Amerikano kaniadtong Marso 26, 1945.
Niadtong tuig 2009 ang mga estatuwa sa mga sundawo nga gipabarog sa Landing Shrine nangaputol ang kamot ug ang mga pusil.
Kahinumdoman nga sa pagpatukod sa maong landing shrine ang siyudad nakapagawas og dakong pundo kay giilisan ang unang mga estatuwa nga giingong sub-standard.
Ang maong mga estatuwa mao ra og manikin sumala sa mga tigpaniid.
Halos matag tuig kung magsingabot na ang pagsaulog sa Takas sa Talisay ang siyudad mogahin og budget sa rehabilitasyon sa Landing Shrine. (BANAT NEWS)
- Latest
- Trending
