Online portal gilusad sa Malacañang

CEBU, Philippines - Gilusad  sa kagamhanan  ang online portal  nga data.gov.ph, aron sa pagmatuod nga walay gitagong sekreto ang administrasyong Aquino sa publiko .

Si Elvira Bongosa sa  Phil. Information Agency (PIA)7 nagkanayon  nga  si  Presidential Spokesperson Edwin Lacierda  maoy mipasalig  nga  usa  kini ka lakang paingon sa transparency diin makita sa katawhang Pilipino ang mga gihimo sa gobyerno.

Matud  pa ni Bongosa  nga mibahad  si Lacierda  nga wala sila  mabalaka  tungod  kay  walay  mga sekreto  ang  kagamhanan  nga  angay  itago  sa  publiko.

Midugang  si  Bongosa  nga   ang tanang  hisgotanan karon, gipagawas  na  sa Malacañang  ug bukas kaayo sila nga mopasabot niini  sa katawhan. Miingon  si  Bongosa  nga  sa kasamtangang administrasyon makita sa kadaghanan ang pipila sa mga record nga nanggawas sama sa PDAF, DAP ug tanang  mga butang    nga gilalisan.

“We’re not afraid of any secrets. In fact, lahat naman ngayon na mga issues, nilalabas naman namin, and we’re very open about it. This is the administration where you saw a number of data coming out: PDAF, DAP, all the national concerns. We have never shield away from disclosing what the public deserves to know,” matud pa ni Lacierda.

Apan nagkanayon  si Bongosa nga nakapaduda hinuon ang paglusad sa maong website nga giingong basin ang open data niini maoy tubag sa Malacañang sa hinay nga pagduso niini sa freedom of information (FOI) bill.

Midugang  si  Bongosa  nga miingon  ang   Malacañang, nga napakita na nila sa publiko ang determinasyon sa ehekutibo nga mosunod sa probisyon sa batakang balaod aron  nga kahatagan og kasayuran ang publiko sa   mga  butang  nga  angayang  hisayran  sa tanan.

Matud  pa  ni Bongosa   nga adunay kaugalingong version sa FOI bill ang Malacañang, apan   ang sunod nga lakang niini giingong anaa na sa lehislatura.     

Hinuon  nagkanayon  si  Bongosa  nga  si  Lacierda mipasalig  nga mabinantayon kanunay ang Presidente sa paggamit sa iyang gahum, uban niini  ang pagsertipika isip urgent sa usa  ka balaodnon.

Samtang mibutyag  si  Bongosa  nga nanawagan si Lacierda sa mga “hackers” nga dili unta hilabtan ang Open Data Philippines tungod kay usa man kini ka lakang paingon sa sihag nga pagdumala sa kagamhanan. (BANAT NEWS)