1 sa 2 ka piniriso sa Pinamungajan mipuga

CEBU, Philippines - Duha ka pinirisong tulisan  sa lungsod sa Pinamungajan nga gipasakaan og kaso milayat sa patrol car sa kapolisan duol sa Toledo City Public Market sa barangay Poblacion sa dakbayan sa Toledo pasado alas 12:00 sa miaging udto.

Ang mipuga naila nga sila si Joed Silva, 21 ug Joel Canillas, 20, nga pulos  taga barangay Tajao sa lungsod sa Pinamungajan.

 Matud pa nga may  posas  pa ang  mga kamot sa duha  dihang milayat kini sa patrol car. Si Chief Insp. Roseller Paler ang hepe sa Pinamungajan Police miingon nga ang mga suspetsado gikan pa sa Cebu Provincial Prosecutor’s Office aron mapasakaan og kasong pagpanulis. Matud pa nga uban sa suspetsdo ang kihante nga ilang silingan nga si Analiza Galiguid, 39, kinsa  misakay  usab sa patrol car sa kapolisan. Matud pa human mapasakai og kaso ang mga suspetsado mipadulong na kini sa pag-uli.    

 Gimaneho ang maong sakyanan ni  PO2 Froilan Velasquez ug sakay usab ang  Women’s and Children’s Protection Desk officer nga si  PO3 Nonita Baroman.

 Matud pa nga ang mga suspetsado didto sa luyo sa patrol car naglingkod kuyog ni PO1 Jonevier Manabat, ang imbistigador sa maong kaso. Ang arresting officer nga si PO2 Alcris Labrador ug PO2 Bendie Nuñez gikataho nga wala mokuyog balik sa Pinamungajan tungod sa personal nga rason ug nagpabilin sa dakbayan sa Sugbo. Matud pa nga si Manabat mipahimangno pa sa duha nga dili mo-eskapo samtang hinay nga  nagdagan  ang  ilang  gisakyan   kay nagsunod kini og prosisyon.

 Apan kalit  nga milayat  ang duha, unya nakuptan ni Manabat si Canillas apan nakasibat gayud si Silva.

 Gimandoan na ni Paler ang kapolisan sa pagpangita ni Silva sa  tanang lugar nga posibli niining adtoan.

 Tungod sa maong insidente si Paler momando nga mo-explain si Labrador ug si Nuñez nganung wala sila mokuyog sa pagpauli sanglit sila man ang responsable sa pag-escort sa maong mga piniriso. (BANAT NEWS)