Sundawo’ng mibantay sa Sinulog 2014 gipahalipayan

CEBU, Philippines - Gipahalipayan sa Commander sa Central Command Maj. Gen. John Bonafos ang mga sundalo nga mitabang sa pagbantay sa kahusay ug kalinaw sa Sinulog atol sa tinuig nga conference sa mga military commander sa Kabisay-an kagahapon.

 Matud pa  ni Bonafos nga lakip sa gipakatap niadtong  Sinulog mao ang usa ka team sa Explosive Ordnance Division, K9 unit, ug ang covert teams sa Quick Reaction Force nga gipabantay sa rota sa grand parade.

 Gipahimug-atan ni Bonafos ang papel sa military isip partner sa katawhan sa pagsustinir sa kahusay ug kalinaw.

 Sumala pa ni Bonafos nga padayon ang tabang sa AFP  ngadto sa nabiktima sa bagyong Yolanda sa Kabisay-an.

  Apan gipahugtan gihapon sa Central Command ang pagbantay sa katawhan sa Kabisay-an.

 "We are focusing on the relief operation and the rehabilitation of the typhoon victims, but we are also looking on the security concerns of the victims and all of the Visayas," matud pa ni Bonafos.  Dugang ni Bonafos nga sukad sa iyang paglingkod isip Commander sa CentCom,  padayon sila sa pagpakigbatok sa mga rebeldeng grupo.

 Apan andam ang kadagkoan sa Central Command sa posibling pakigsabot-sabot tali sa mga rebeldeng pundok sa umaabot.

 Ang maong conference gitambongan sa mga commander sa rehiyon 6, 7 ug 8 lakip na usab sa mga Regional Director sa kapolisan sa maong mga lugar. (BANAT NEWS)