Armadong Brazilian nadakpan

CEBU, Philippines - Nasikop sa kapolisan sa Danao ang usa ka Brazilian national tungod sa nakuhang mga armas ug drugas pasado alas 3:00 sa miaging adlaw diha sa usa ka baraderohan sa barangay Dungo-an sa maong dakbayan. Ang suspetsado naila nga si Delcon Tamayose, 46, negosyante og buy and sell nga mga yati ug kasamtangang nagpuyo sa nahisgutan nga lugar apan lumad nga taga Baihia, Brazil.

Sumala pa nga nakadawat og taho ang kapolisan sa dakbayan sa Danao sa alas 2:55 sa miaging hapon nga dunay tawo nga armado nga nagmotor padulong sa drydock sa barangay Dungo-an.

Dali nga gisusi sa kapolisan ang lugar ug ilang nakit-an  si Tamayose  nga kadudahan ang lihok hinungdan nga ila kining girekisa ug diha nakuhaan kini og armas ug drugas.

Lakip nakuha ang usa ka paltik nga kalibre .22 nga Black Widow Magnum nga may lima ka bala, tulo ka rifle grenades, usa ka semi-automatic rifle nga AR-15 nga may napulo ka bala.

Nakuhaan usab ang suspetsado og duha ka vial sa nubain, lima ka syringes ug usa ka paketeng shabu, passport, upat ka klaseng document stamps ug ang Sunriser nga motor niini. Sumala pa sa provincial director sa Cebu Provincial Police Office nga nakig-alayon na siya sa Bureau of Immigration ug sa Interpol kalabot sa pagkasikop sa maong suspetsado. Matud pa nga ang passport sa suspetsado mi-expire na niadto pang tuig 2011.

Sumala pa nga unang misulod sa nasud si Tomayose sa Puerta Gallera, Mindoro, ug mipuyo siya sa dakbayan sa Danao sulod na sa tulo ka tuig tungod kay naa siya’y gikapuyo sa maong lugar.

Ang maong langyaw mag-atubang og patong-patong nga kaso nga kalapasan sa RA 10591, RA 9156 ug RA 9165. (BANAT NEWS)