Negosyante nga lolo gitulis ug gipatay sud sa iyang balay

CEBU, Philippines - Usa ka negosyante nga lolo ang napalgang patay sud sa iyang panimalay  ug gituohang gitulis ug gidunggab diha sa sitio Sambag 1, barangay Babag sa dakbayan sa Sugbo.

Ang biktima naila nga si Amancio Sigue, 81, dunay tindahan ug tigpahuwam og kwarta sa nahisgutan nga lugar.

Base sa imbestigasyon sa Homicide Section sa Cebu City Police Office nga ang silingan niini nga Roselo Jacinal nagkanayon nga manghuwam unta og lighter maoy nakadiskubre kaniya.

Matud pa nga nahibulong si Jacinal nga wa motubag si Sigue bisan giunsa niya og sangpit ug kay wala man siradohi ang pultahan iyaha kining giablihan apan maoy iyang nakita ang lawas sa tiguwang nga nagbuy-od ug nagkadugo.

Ang mga kabanay ni Sigue mitawag unta og taga punerarya aron kini mahipos apan wala modayon ang mga embalmer pagkakita nga duna kini mga samad sa dughan ug ulo ug nagduda sila nga gipatay kini.

Si PO3 Edilberto Gabucan sa Cebu City Police Office Public Safety Company maoy giduol sa banay ni Sigue kinsa mao dayo’y mipahibalo sa Homicide Section.

Nakita sa grupo ni SPO1 Ruth Violango sa Homicide Section nga dunay samad dinunggaban sa likod sa tuong dunggan sa biktima nga posibli nga hinungdan sa hinanaling kamatayon niini.

Sa pagsusi sa kapolisan sa mga butangan niini og kwarta, wala na diha ang gitipigang P30 mil ug ang cellphone niini. Nagduda karon ang kapolisan nga gitulis kini una pa gipatay. (/EIM)(BANAT NEWS)