Gun for hire napatay

CEBU, Philippines - Patay ang usa ka lalaki nga gipasanginlang maoy gunman pagpatay sa usa ka negosyante og construction supplies sa Naga City sa milabay’ng tuig dihang giingong misukol kini sa mga polis nga mi-serve og warrant of arrest kaniya kagahapon sa buntag diha sa sitio Abuno sa barangay Tunghaan sa lungsod sa Minglanilla.

Ang napusilan patay mao si Jennel Librea, 29, taga- barangay South Poblacion sa dakbayan sa Naga. Samtang kritikal si Van Vincent Mabanag, 28, taga-Barangay Tuyan sa dakbayan sa Naga.

Matud pa nga padulong i-serve sa kapolisan ang warrant of arrest ni Librea nga gi-isyu ni Regional Trial Court Judge Estella Alma Cinco, sa Branch 12 sa dakbayan sa Sugbo tungod sa pagpusil patay kang Renante Bacus ug i-serve unta sa team ni SPO2 Ian Quitayin.

Si Bacus gipusil patay diha mismo sa atubangan sa iyang balay nga dunay tindahan sa Tuyan, Naga niadtong Nobiyembre 19, 2013.

Giatangan sa barangay Tuyan sa dakbayan sa Naga si Librea human nakadawat sila og kasayoran nga mag-agian kini sa maong lugar. Dihang gipara sa  grupo  ni Quitayin ang duha giingong mibunot og kalibre. 38 rebolber si Mabanag ug misulay og pusil sa mga polis apan swerte nga mikagar ang iyang armas hinungdan nga gipusil kini sa kapolisan duha ka higayon.

Natagak sa motor si Mabanag ug daling mipasirit padung sa Minglanilla si Librea hinungdan nga kini gigukod hangtud nga na-corner kini sa sitio Abuno ug didto nakigpinusilay sa mga polis apan napusilan sab kini.

Ang duha gidala sa Minglanilla District Hospital apan namatay si Librea samtang gibalhin si Mabanag sa Vicente Sotto Memorial Medical Center tungod kay talandugon ang iyang kahimtang. Narekober sa kapolisan gikan kang  Mabanag ang  kalibre .38 nga  revolver ug narekober sab kang Librea ang kalibre .45 nga pistola.

Matud pa nga si Librea ug Mabanag gikatahong mga gun-for-hires ug nalambigit sa illegal nga drugas ug mga sakop sa usa ka fraternity. Si Mabanag mag-atubang og kasong kalapasan sa RA 10591 or Comprehensive Firearms and Ammunition Regulation Act.  (/EIM)(BANAT NEWS)