Prinsipal gipusil patay sa maestro,suspek nagpusil sa kaugalingon

CEBU, Philippines - Patay ang usa ka elementary school principal human kini gipusil sa usa ka magtutudlo sud mismo sa ilang eskuylahan atubangan sa mga tinun-an diha sa lungsod sa Pontevedra, Negros Occidental kagahapon.

Giila ni Senior Insp. Mary Rose Salve Pico, ang hepe  sa Pontevedra Police Station, ang biktima mao si Jojit Gaudiel, kinsa maoy acting principal sa Trinidad Elementary School sa Brgy. Don Salvador Benedicto.

Samtang ang mipusil kaniya mao ang  maestro nga si  Harold Salas.

Si Salas kinsa giingong namatikdang depressed sa nangaging mga adlaw mipusil usab sa iyang kaugalingon human sa hitabo.

Matud pa ni Pico gisuwayan pa pagdala si Gaudiel sa Valladolid District Hospital  ug gibalhin sa Riverside Medical Hospital sa Bacolod, apan namatay kini paglabay sa duha ka oras.

Samtang dead on arrival na si Salas sa Pontevedra Municipal Health Center  matud pa ni Pico.

Duha ka .38-caliber paltik revolvers ang nakuha gikan kang Salas human sa hitabo. Dugang nakuha gikan sa iyang bulsa ang upat ka basiyo ug unom ka darts.

Dunay mga nanggawas nga report nga problema sa gugma ang gihambin ni Salas apan giklaro ni Pico  nga wala kini mogawas sa ilang imbestigasyon.

Matud pa nga gipusil ni Salas si Gaudiel samtang padung kini mosakay sa iyang motor diha sa gawas sa prinsipal’s office apan mikagar ang armas maong nakadagan kini, apan giusban siya pagpusil ug naigo sa ulo.

Human niini, midagan si Salas sa classroom  sa laing maestro nga si Ernie Espadero ug didto giingong nagpusil sa iyang kaugalingon, wa diha sa Espadero sa iyang classroom nianang tungora. Si Espadero gikatahong karibal ni Salas sa babaye. (Danny B. Dangcalan sa The Freeman/EIM)(BANAT NEWS)