Cargo vessel nalunod oil spill gibantayan

CEBU, Philippines - Nakompirmar karon nga dunay mi-leak nga lana sa nalunod nga cargo vessel nga dunay 28,000 ka sakong abuno sa Iloilo Strait niadtong Domingo, hinuon luwas ang tanang 29 ka crew niini nga naagian sa mga pasaheroang pump boats nga nagbiyahe sa Iloilo-Guimaras route.

Ang M/V Sportivo nalunod samtang nitago unta sa makusog nga hanging amihan. Matud pa ni Commodore Athelo Ybañez, ang commander sa Phil. Coast Guard-Western Visayas gi-monitor nila karon ang oil spill.

Dunay lima ka metros nga gilapdong oil sheen nga nakita gibanabanang duha ka kilometros padung sa lungsod sa Jordan sa Guimaras matud pa ni Ybañez.

Ang M/V Sportivo  adunay 12,000 liters nga bunker fuel, 1,000 liters nga special fuel number 60, ug 200 liters nga lube.

Ang PCG-Western Visayas midemanda sa tag-iya sa maong barko nga kinahanglang mapalutaw nila kini sa labing daling panahon. Ang tag-iya sa maong barko nagbase dinhi sa Sugbu nga mao ang Seen Sam Shipping, Inc..

Ang maong barko mi-angkorahe unta sa Iloilo Strait gibanabanang 1,500 ka yarda gikan sa bukana sa Iloilo River tungod sa bagyong Agaton niadtong Sabado samtang padung unta sa Palawan.

Ang kapitan niini nga si Nemesio Igona, mibutyag nga naguyod ang ilang angkla ug nasaghid sila sa laing cargo vessel nga M/V Jehan 5 nga duna say mga kargamentong mga semento alang sa Iloilo City, apan nabuslot ang ilang barko ug nasudla’g tubig hinungdan nga nalunod. (Jennifer Rendon sa The Freeman/EIM)