Pugante sa Leyte mitahan sa Liloan, Cebu

CEBU, Philippines - Mitahan sa kapolisan sa lungsod sa Liloan  kagahapon ang usa ka binilanggo sa Palo, Leyte Jail nga miabot dinhi sa Sugbo kuyog sa mga  biktima sa bagyong Yolanda niadto pang  Nobiyembre sa miaging tuig.

Si PO3 Jesson Gayo sa kapolisan sa maong lungsod miila sa mitahan nga mao si Teodoro Dandan, 51, minyo,  usa ka  balut vendor nga taga Pago, Tanauan, Leyte.

Temporaryo  siya  nga nagpuyo sa barangay Tayud sa lungsod sa Consolacion.

Matud pa ni PO3 Gayo nga miabot  sa ilang buhatan si Dandan alas 11:00 kagahapon sa buntag ug mitug-an  nga lima na siya ka bulan nga nabilanggo sa Palo, Leyte Jail tungod sa kasong homicide nga iyang giatubang.

Dugang pa ni PO3 Gayo nga naglisod si  Dandan sa iyang panginabuhi sa kasamtangan niyang gipuy-an sa lungsod sa Liloan ug gikapoy na usab sa pagtagotago.

Hinungdan nga nakahukom na lamang kini sa pagtahan sa iyang kaugalingon.

Si PO3 Gayo miingon nga giangkon ni Dandan nga nakagawas  siya sa  bilanggoan  sa Palo, Leyte Jail atol  sa pagkuso-kuso sa bagyong Yolanda.

Sa  iyang paglikay nga masulod og balik sa selda,  nakahukom  siya sa pag-ikyas  ug misagol  siya sa  mga  namakwit  nga  taga  Leyte  paingon  sa Sugbo  sakay  sa C130  plane  niadtong  Nobiyembre. (BANAT NEWS)