Halin sa bottled water menos tungod sa kabugnaw sa panahon

CEBU, Philippines - Kung menos ang halin sa mga mamaligyaay ug manghimoay og imahen sa Senyor Sto.Niño karong kapistahan niini, mihinay usab ang halin sa mga binotelyang tubig diha sa kadalanan gumikan sa kabugnaw sa panahon kagahapon tungod sa bagyong Agaton nga nakasulod na sa Pilipinas.

Kini maoy nasayran sa Banat News sa mga pagpangutana sa pipila ka mamaligyaay og tubig diha sa kadalanan kagahapon.

Si Danny kansang tibuok niyang  pangalan wa niya ibutyag miingon nga sa nanglabay nga mga Sinulog makahalin siya og taglima ngadto sa pito ka karton sa tibuok adlaw niyang pagpamaligya.

Apan kagahapon, igo ra siyang nakapahalin og upat ka karton. Wala sila magsalig sa mga contingents nga mamalit niini kay kaniadto pa duna man sila’y dalang tubig sa nagsunod nga sakyanan, ang mamalit gyud og tubig mao ang mga nanan-aw.

“Menos lagi kaayo, bugnaw man gud, naghabo-habo pa gyud. Dili parehas niadto nga paspas kaayo ang halin usahay modagan pa gud mi sa supplier aron magdungag og tubig,” sumala pang Danny.

Bisan ang mga namaligya og mga ice drops ug mga halo-halo sa daplin-daplin wala usab kaayo’y halin tungod gihapon sa kabugnaw sa panahon.

Base sa alas-4 sa hapon kagahapon nga forecast sa Philippine Atmospheric Geophysical and Astronomical Services Administration (PAGASA), ang tropical depression Agaton nahimutang karon sa 215 kilometro sa habagatang-silangan sa Hinatuan, Surigao del Sur o 220 kilometro sa silangang bahin sa Davao City (7.1°N 127.8°E) nga may hangin nga may gikusgong 55 kilometro kada oras duol sa mata niini ug gipaabot nga moirog sa habagatang-kasadpan sa gipaspason nga lima ka kilometro kada oras. Samtang nasinati karon sa Luzon ug Visayas ang hanging amihan.           

Sama sa naandan, daghan usab kaayong mga basura ang nagpasad bisan pa man sa pahimangno sa siyudad ug sa Department Environment and Natural Resources kabahin sa hustong paglabay sa ilang mga basura diha sa kadalanan.

Kagabii palang human sa parade nagsugod dayon ang mga sakop sa Department of Public Service (DPS) sa pagpanglimpyo sa kadalanan.

Sagad sa mga gipamiyaan nga mga basura mao kadtong disposable food packs, mga lata sa softdrinks, mga papel, mga botelya sa tubig, plastic cups ug sudlanan sa junkfoods.

Samtang naobserbahan usab ang kakulang sa mga pansayan o portable toilets sama nalang diha sa eskina sa R. Landon ug Osmeña Blvd.diin pipila sa mga nanan-aw ang nangreklamo gumikan sa kapansot.

Hinuon, wala na mahitabo ang kaniadto paghuot sa maong dapit tungod sa mga nakaali nga mga props sa mga cotingents nga naghimo sa maong lugar nga “choke point” ug peligro sa mga tawo nga magka-stampede. (BANAT NEWS)