30 ka barko wala mobiyahe tungod sa bagyong Agaton
CEBU, Philippines - Sa pagsaulog sa mga Sugbuanon sa bisperas sa Sinulog kagahapon, traynta ka biyahe sa barko ang wala makalarga tungod sa dili maayong panahon bunga sa pagsulod sa bagyong Agaton nga mitugpa na sa Mindanao kagahapon sa hapon.
Base sa tala sa Coast Guard District Central Visayas kutob alas singko sa hapon kagahapon, 799 ka mga pasahero ang apektado samtang 20 ka rolling vessel ang wala makalarga.
Lima ka biyahe paingon sa dakbayan sa Ormoc gikan siyudad sa Sugbo ang wala mahinayon. Ang M/V Rosalia 3, M/V Fiji II ug M/V Lapu-Lapu Ferry 8 nga paingon sa Leyte gikan sa Sugbo wala sab makalarga.
Ang paingon sa Nasipit nga M/V Saint Leo the Great nga aduna untay sakay nga 624 gikan gihapon sa Sugbo wala sab makadayon og larga.
Sama sa uban wala sab mahinayon ang gikan sa Camotes nga MBCA Esperanza 8, MCBA Jun Mar 2, M/V Mika Mari I, M/V Mika Mari V ug M/V Mika Mari III.
Apil na sab ang MBCA Super SM paingon Cadiz, Negros Occidental ug MBCA Deep Sea Metro 1 paingon sa Hagnaya nga gikan sa substation sa Bantayan.
Sa amihanang Sugbo, lima ka barko sab nga gikan sa Hagnaya paingon sa Sta. Fe ang wala makalarga apil na ang M/V Super Shuttle Ferry 19 nga gikan sa Polambato, Bogo City nga paingon sa Cawayan, Masbate.
Gikan sa substation sa Tangil, ang M/V Leonor 2,3,5, M/V Island Roro I ug LCT San Juan de Bautista nga paingon sa Negros Oriental wala sab makalarga. (BANAT NEWS)
- Latest
