Mga estudyanteng tipdason papaulion

CEBU, Philippines - Mipagawas og sumbanan ang Department of Education (DepEd) alang sa ilang ‘anti-measles campaign’ agi og tubag sa nagkadaghang kaso sa nataptan sa makatakod nga sakit nga tipdas.

Si Elvira Bongosa  sa Philippine  Information Agency (PIA)7 mibutyag nga  may  memo  niini  si Education Secretary Armin Luistro nga  nag-awhag sa principal sa tanang eskuylahan nga papaulion sa ilang balay ang mga estudyanteng nagpakita og simtoma  sa flu  o mga timailhan sa sakit nga tipdas.

Midugang  si  Bongosa  nga gimando usab sa kalihim ang pagpakatap sa kasayuran bahin sa tipdas, pagpabakuna ug ang pakigtambayayong sa local government health units alang sa kompletong pagpabakuna sa mga bata.

“The regional directors and Student Division Superintendents (SDS) shall mobilize all school officials to undertake supportive activities,” matud pa sa memo. Gihangyo usab sa DepEd ngadto sa mga tunghaan sa pagtino pinaagi sa Preventive Alert System for Schools (PASS) ang mga kaso sa tipdas sa ilang mga tunghaan  ug ipahibalo kini dayon sa ilang local health units.

Ang  PASS, usa ka sistemang  pagpadangat  sa kasayuran kalabot sa kahimtang sa panglawas sa mga estudyante ug magtutudlo ngadto sa mga ahensya sa ilang lugar.Ubos niining maong sistema, gipangayoan ang mga prinsipal sa pagpahigayon og  inadlaw   nga  pagsusi  sa  panglawas  sa ilang  mga  estudyante. (/WC)(BANAT NEWS)