Bombero sa Talisay nangayo’g water tanker

CEBU, Philippines - Ang kabomberohan sa dakbayan sa Talisay nagkinahanglan og water tanker pangandam kun adunay  sunog ug sa pag-abot sa El Niño o dakung huwaw.

Ang hepe sa kabomberohan sa siyudad nga si Senior Inspector Randy Mendaros nagkanayon nga nagkinahanglan gyud sila og water tanker aron makapundo og daghang tubig. Ang pagpundo og daghang tubig daku kaayo nga  tabang sa pagpatay sa kayo sa  tanang  sunog  nga  mahitabo.

Gawas niini ang water tanker magamit usab sa  pagpangrasyon og tubig ngadto sa kabukirang barangay kung moabot ang huwaw.

Kahinumdoman nga sa milabay’ng  tuig ang kabomberohan sa siyudad matag adlaw mosaka ngadto sa mga bukirang barangay sa siyudad aron mangrasyon og tubig sa nga residente panahon sa tinghuwaw.

Atol sa gipahigayong tigom sa City Peace and Order Council (CPOC) sa milabay’ng Martes, ang kabomberohan sa siyudad mihangyo nga unta ang siyudad mopalit og water tanker. Si Konsehal Danny Caballero, Vice Chairman sa CPOC mipasalig nga ipaabot niya ngadto kang Mayor Johnny De los Reyes ang maong yangungo sa kabomberohan. (/WC)(BANAT NEWS)