P1,000 kada video karera nga masakmit

CEBU, Philippines - Ang Talisay City peace and order council mitanyag og cash incentives alang  sa mga makakompiska ug maka-report ngadto sa mga otoridad kabahin sa mga makinang pasugalan diha sa ilang mga barangay.

Ang maong tanyag mitumaw human sa mga nadawat nga report sa kagamhanan sa siyudad bahin sa pagsibaw sa video karera sa Talisay.

Si Talisay City councilor Danny Caballero kinsa maoy chairman sa peace and order council nagkanayon nga paningkamutan nilang mabalik ang imahen sa siyudad nga gambling free.

Si Talisay City Public Information Officer Vincie Monterde sa iyang bahin, mibutyag nga nasabutan nga ang siyudad mohatag og incentive ngadto ni bisan kinsa nga makahatag og tip kabahin sa video karera machines diha sa ilang lugar.

Matud ni Monterde nga ang rekomendasyon sa maong lakang isumitir kini ngadto kang Mayor Johnny De los Reyes.

Si Monterde miingon nga ang tipster hatagan og P1,000 sa matag usa ka video karera nga makompiska, ang maong budget kuhaon gikan sa intelligence fund sa mayor.

Giingong ang mga ginikanan sa kabarangayan diin dunay nag-operate og mga video karera ang mi-report ngadto sa kagamhanan sa siyudad.  (BANAT NEWS)