CEBU, Philippines - Patay ang usa ka lalaki nga nagsakay og motor human kini gipusil sa duha ka lalaki nga nagsakay usab og motor pasado alas-4 kagahapon sa kaadlawon sa sitio Sangi, barangay Calajo-an sa lungsod sa Minglanilla.
Ang biktima naila nga si Jovenil Reroma, 56, molupyo sa Poblacion Ward 4 sa lungsod sa Minglanilla. Samtang pabilin nga wala pa mailhi ang duha ka tawo nga responsable sa maong pagpamusil.
Matud pa ni PO2 Nikki Carlo Plarisan ang desk officer on duty nga nahinabi sa Banat News nga ang biktima luwan sa iyang motorsiklo sa nahigutang lugar dihang dunay duha ka lalaking sakay sa motor ang mipusil sa tangkugo ug milusot ang bala sa tuong aping sa biktima.
Gidali og dala sa Minglanilla District Hospital ang biktima apan gideklarar na kini nga dead on arrival sa attending physician.
Human sa maong hitabo dali sab nga misibat ang mga suspetsado sa wala pa mahibaw-i nga lugar. Padayon pa ang imbestigasyon sa kapolisan sa kamatayon sa biktima. (BANAT NEWS)