CEBU, Philippines - Gipusil patay ang usa ka lalaki nga suspek sa pagpamusil sa miaging Pasko samtang kini nagsakay og tricycle sa miaging adlaw diha sa sitio Sombria, barangay Lawaan II sa dakbayan sa Talisay.
Ang biktima naila nga si Manuel Caña, 45, molupyo sa barangay Lawaan II sa dakbayan sa Talisay.
Base sa imbestigasyon nga gihimo ni PO3 Jason Del Campo, PO2 Edwin Campomanes ug ni PO1 Marlon Añabeza nga nagsakay og tricycle ang biktima dihang may duha ka tawo ang mipaulan kaniya og bala.
Patay na kini pag-abot sa Talisay District Hospital gumikan sa mga samad pinusilan sa likod. Matud pa ni PO2 Junard Chiong nga base sa imbistigasyon nga personal grudge ang posibling motibo sa kamatayon sa biktima.
Sumala pa ni Chiong nga ang biktima maoy gitumbok nga suspek sa kamatayon sa manag-inahan nga sila si Carlota Caña ug ni Christian Caña niadtong Disyembre 25 sa miaging tuig, giingong paryente ra ang manag-inahan ug ang suspek.
Apan bisan natumbok na kini nga maoy suspek sa maong krimen wala kini mapasakai og kasong double-murder gumikan kay way mibarog nga testigo batok kaniya. (BANAT NEWS)