Wa masayod nga may lana sa Aloguinsan
CEBU, Philippines - Nakugang ang mga molupyo sa barangay Olango, lungsod sa Aloguinsan sa taho nga adunay lana nga nadiskobrehan sa ilang lugar. Kini gumikan kay niadto pang buwan sa Septiyembre nga giundangan sa Gas2Grid ang ilang operasyon.
Gani mingaw ang dapit sa dihang gibisitahan sa The Freeman ug Banat News ang dapit gawas sa guwardiya nga nagbantay niini.
Matud pa ni barangay kapitan Cirila Carang nga mismong operations manager sa kompaniya ang nipahibawo kanila nga kung may mangutana, ipaadto lang ang buhatan sa Department of Energy. “Kami nahibong lagi mi og ngano nikalit lang,†matud pang Carang.
Usa sa mga nakatrabaho sa kompaniya nga si Daniel Bautista nikompirmar nga wala na silay trabaho sukad niadtong Septiyembre ug nakurat nalang sila sa taho nga dunay lana nga nadiskobrehan.
“Kami nga nagtrabaho wa man hinoon kahibawo,†matud pang Bautista. Apan si Carang nanghinaut nga tinuod ang taho sanglit makabenepisyo man usab ang katawhan.
Si Mayor Augustus Caesar Moreno malaumon nga matinuod ang taho ug nasayod na siyang daan sukad pa pagsugod sa tuig 2005, nga adunay lana ang lugar apan kinahanglan pa nga sutaon.
Gawas sa benepisyo sa panarbaho, matud pang Moreno nga makatigum usab ang lugsod sa kita sa maong oil field.
“If you have to weigh between unsay kaayuhan ug unsay negatibo, dako kaayo og bintaha uy ug madayon na siya,†matud pang Moreno. Ang Gas2Grid Ltd. mismo ang nipahibawo nga giila na sa DOE ang ilang operasyon ug gani gilugwayan pa ang ilang kontrata nga moepekto karong Enero 28 aron makapadayon ang operasyon. (BANAT NEWS)
- Latest
