Naninda og litson ‘namoyboy’ sa gobiyerno
CEBU, Philippines - Namoyboy ang usa ka tindahan og litson sa Sugbo ngadto sa gobiyerno human gipasanginlan nga wa magtarong og bayad sa buhis.
Kini ang nakapaaghat sa tagdumala sa Zubuchon nga maningil na sa bayad sa Kapitolyo sa mga litson nga nakuha sa niaging administrasyon aron ibayad sa buhis ngadto sa Bureau of Internal Revenue. Matud pa sa Zubuchon nga nakadonar usab sila og dinosena nga litson sa dihang nangampanya si Presidente Benigno Aquino III sa iyang pagpapili isip presidente niadtong Enero 2010.
Matud pa nga kung pabayron sila og buhis sa paghatag sa litson, ang ibayad sa Kapitolyo mao ang ilang ibayad ngadto sa BIR.
Sa niaging administrasyon sa Kapitolyo, pipila ka buwan lang mabayran na sila sa utang nga litson nga gipakaon sa mga bisita apan karon nilungtad na og 18 ka buwan nga wala na gyud sila makadawat og bayad.
Nasuko ang Zubuchon sa gipublikar sa BIR nga usa sila sa dagkong tindahan og litson sa nasud nga wala magtarong og bayad og buhis.
Nabalaka ang Zubuchon nga pabayran usab og buhis sa BIR ang ilang napangapod-apod nga pagkaon sa mga biktima sa bagyong Yolanda sa amihanang bahin sa lalawigan sa Sugbo. “So if the Governor’s office pays us, we can pay the BIR the donors tax. Ridiculous. Just frigging ridiculous,†matud pa sa tagdumala sa Zubuchon. Buot usab ipasusi sa BIR kung ang nagpasiugda sa fundraising ni Aquino ug kalihukan sa kampanya nagbayad sa tukmang buhis.
“If you want a daang matuwid (straight path) then make sure your government lieutenants charged with collecting all taxes do their jobs in a fair, factual and comprehensive manner, is all I can ask for,†panawagan sa Zubuchon sa BIR. Ang Zubuchon natukod sa Sugbo niadtong 2009 ug nag-abli sa ilang tindahan niadto lang Hunyo 2011.
Matud pa nga minilyon na ang nabayad nga buhis sa maong kompanya ngadto sa BIR. (BANAT NEWS)
- Latest
