Sinulog sa Kabataan-Lalawigan tuburan ug talisay midaog

CEBU, Philippines - Nasakmit sa Tuburan National High School ug Talisay City Central School ang 1st place sa Sinulog sa Kabataan Lalawigan kagahapong adlawa.

 Ang mga miapil sa Sinulog sa Kabataan Elementary Division mao ang Mandaue City Central School, Taytay Elementary School sa Danao, Langtad Elementary School sa Naga, Talisay City Central School ug ang Ginatilan Elementary School.

Samtang sa Secondary Division mao ang La Paz National High School sa Bogo, Uling National High School sa Naga, Sabang National High School sa Danao ug ang Tuburan National High School.

Nakuha sa Taytay Elementary School ang 5th place, sa 4th place ang Langtad Elementary School, 3rd place ang Ginatilan Elementary School, 2nd place ang Mandaue City Central School ug 1st place, Best in Musicality ug Best in Costume ang Talisay City Central School. Sa Secondary Division, nakuha sa La Paz National High School ang 4th place, 3rd place ang Sabang National High School, 2nd place ug Best in Custome ang Uling National High School ug 1st place ug Best in Musicality ang Tuburan National High School.

Si Mayor Democrito Diamante sa lungsod sa Tuburan nahinabi sa Banat News, miingon nga kini ilang gibuhat panaad ngadto kay Señor Santo Niño nga magpasalamat sa mga grasya nga nadawat ug mag-ampo nga ipalayo kita sa mga kalamidad.

Matud ni Mayor Diamante nga gikan sa cultural group ang gigamit nila nga kwarta para sa Sinulog. Sumala pa ni Mayor Diamante nga, okay na ang gipangayo nila nga financial assistance gikan ni Gobernador Hilario Davide III apan wala pa mahibaw-i kun pila ang budget.

Si Fernando Cabrillas, choreographer sa Tuburan NHS nahinabi sa Banat News miasoy nga unom ka buwan ang ilang pagpangandam para sa Sinulog.

“Three months conceptualization ug three months ang amo practices,” matud ni Cabrillas kinsa miingon nga ang ilang tema  karon “Tree of Life”, gigamit nila  ang lubi isip simbolo niini.  Ang lubi usab ang usa sa mga produkto nga naa sa ilang lungsod. Si Richard Vergara,15,  4th year high school, dancer sa Tuburan NHS nahinabi sa Banat News miingon nga gipaninguha nila nga sila ang makadaog ug naa sila’y maani sa ilang sakripisyo matag practice nila.

“Worth it gyud kaayo ang tanang pag-antos kay kami gyud ang nakadaog” matod pa ni Vergara.

“Okay ra gyud ko mosayaw bahala uwan o init gamay ra na nga sakripisyo basta para kang Señor Santo Niño lang,” dugang ni Vergara.

Samtang si Marvie Caño, choreographer sa Talisay CCS ug Uling NHS nahinabi sa Banat News miingon nga dili masukod ang iyang kalipay nga gibati. Sigun ni Caño nga usa ra ka buwan ang ilang pagpangandam niini. Gikan usab sa LGU ang ilang gigamit nga funding alang sa Sinulog.

Si Davide miingon nga “angayan gyud ihalad nato ni Señor Santo Niño ang atong mga sakripisyo ug magpasalamat sa tanan natong nadawat nga grasya bisan pa sa mga kalamidad nga miabot nato.”  (BANAT NEWS)