Chocolate Hills sa Bohol angay bisitahon sa mga turista

CEBU, Philippines - Natumbok ang Chocolate Hills sa lalawigan sa Bohol isip usa sa angay bisitahon sa mga turista sa tibuok kalibotan.

Kini human nasulod ang Pilipinas sa Top 10 Countries nga angay suroyon sa tibuok kalibotan matud pa sa Rough Guides, usa  ka travel guidebook sa nasud sa Britanya.

Sumala pa ni Elvira Bongosa sa Philippine Information Agency 7 (PIA-7) nga gawas sa Chocolate Hills sa Bohol, gitumbok usab sa Rough Guides ang mga maanindot nga lugar sa Pilipinas nga angay adtuon sama sa Boracay, El Nido nga limestone islands sa Palawan, ang mga baybayon sa Coron , Palawan ug ang mga  baybayon sa Puerto Galera sa Mindoro.

Dugang pa ni Bongosa nga naapil usab ang maayong  pagkaporma nga Bulkang Mayon sa Kabikolan ug ang mga laaw sa kabukiran sa Mt. Pinatubo.

Matud pa sa Rough Guides nga dili angay sipyaton sa pagsuroy  sa  mga  turista  ang  maong  mga  lugar kun moduaw sila sa Pilipinas.

Nagkanayon si Bongosa nga ang uban pang mga nasud nga nasulod sa listahan sa Top 10 sa Rough Guides mao ang Georgia, Turkey, Macedonia, Japan, Rwarna, Ethiopia, Brazil, Bulgaria ug Madagascar.

Gisaysay ni Bongosa nga dako kini kaayong tabang sa turismo sa Bohol human naigo ang lalawigan sa magnitude 7.2 nga linog niadtong Oktubre 15, 2013 nga nakapahugno sa daghang simbahan, taytayan, tunghaan ug mga panimalay.  (BANAT NEWS)