Mga dagway sa most wanted sa Mandaue City ipatik sa paypay
CEBU, Philippines - Ang Mandaue City Police Office (MCPO) mopatuman unya sa ilang tulo ka programa sa tuig 2014 nga ang tumong mamenusan ang mga krimen sa maong siyudad.
Si Senior Superintendent Petronile Baldebrin, director sa MCPO mitug-an sa mga tigbalita nga ilang ipatuman ang CCTV Warning Sign Stickers and Posters, My Coach Big Brother concept ug ang paghingusog sa kampanya alang sa pagsikop sa 10 Most Wanted Person ubos sa “Pamaypay Program.â€
Ang tulo ka mga programa gipresentar ngadto kang Mayor Jonas Cortes atol sa courtesy call nga ilang gipahigayon nga mao usab ang ilang paglusad sa CCTV Camera Warning Sign Stickers and Posters kagahapon.
Si Sr. Insp. Allan Cuizon sa MCPO mipasabot nga ang CCTV Camera Warning Sign Stickers and Posters maoy pagpahaum sa napanday nga ordinansa sa dakbayan nga nag-awhag sa mga establisamento pagbutang og CCTV camera.
Samtang ang My Coach Big Brother Program mao ang pagdestino sa 80 ka mga sakop sa Regional Police Safety Battalion (RPSB)-7 ngadto sa kadalanan ubos usab sa superbisyon sa MCPO.
Ang ikatulo nilang programa mao ang “Pamaypay Program†diin ang mga pictures sa 10 Most Wanted Persons sa Mandaue City gipatik sa ipanghatag nga mga paypay.
Si Supt. Crisaleo Tolentino, deputy chief for operations sa MCPO mipasabot nga dako og ikatabang sa katawhan ang maong mga programa.
Naglakip sa 10 most wanted person sa MCPO nga napatik ang mga panagway sa gipanghatag nila nga mga paypay mao sila si Alfredo Gerona nga nag-atubang og kasong murder, Jose Aninon Jr nga adunay kasong murder, Arjie Villamor nga ang kaso robbery with homicide, Renante Marsunia Monterola, robbery, direct assault, Armando Gimanoy nga murder ang kaso, Jimboy Pepito Repalam nga murder ang kaso, Alberto Gimanoy murder, Elde Jose Alburo Jr., robbery with hold up, Boyet Arcenal Abella nga murder ang kaso ug Niño Alilin Monroid nga murder usab ang kaso. (BANAT NEWS)
- Latest
