P.Noy, Binay imbitado sa Sinulog Grand Parade

CEBU, Philippines - Ang kadagkoan sa Sinulog Foundation Inc. miimbitar na nila ni Presidente Benigno Simeon Aquino III ug Bise Presidente Jejomar Binay aron mosaksi sa mabulokong pasundayag sa Sinulog Grand Parade karong Enero 19.

Matud ni Ricky Ballesteros, executive director sa Sinulog Foundation Inc. nga apil sa ilang giimbitar mao ang magsoon nga sila si Senador Pia ug Peter Allan Cayetano ingon man si Richard Gordon sa Philippine Red Cross.

Sa miaging tuig giimbitar usab sa Sinulog Foundation si Presidente Aquino pagpatambong sa Sinulog Grand Parade apan wala makaanhi ang presidente. Gihulagway hinoon sa uban nga ang pag-anhi sa presidente makahatag og dakung kahasol sa katawhan.

Kun moanhi ang Presidente sa nasud estrikto kaayo ang mga sakop sa Presidential Security Group (PSG) nga morekisa sa mga tawo nga mosulod sa Cebu City Sports Center nga bisan ang mga ballpen ug tinidor ipabilin.

Ang resulta daghang mga butang nga dili na makuha pagbalik og makamugna kini og dakung kahasol sa mga tawo bugti sa usa lang ka oras nga pag-estar sa presidente sa sports center.

Si Ballesteros miingon nga gamay pa g’yud kaayo ang mga Out-of-Town contingents nga mipadayag og tinguha nga mosalmot sa Sinulog Grand Parade tungod kay ang ubang mga dapit sama sa Leyte dili moapil kay nasinati sila sa bagyo. (BANAT NEWS)