Cash assistance sa mga senior P6 mil na lang

CEBU, Philippines - Si Mayor Michael Rama mipahibalo kagahapon nga tag P6,000 na lang ang ihatag nga cash assistance sa matag senior citizen dinhi sa dakbayan sa Sugbo karong tuiga ug dili na kadtong gisaad niya nga P12,000.

Ang rason ni Rama mao ang wala pag-aprobar sa Cebu City Council sa giduso niya nga budget karong tuiga nga nagkantidad unta og P10.8 bilyones. Ang giaprobahan sa konseho kapin lang sa P5.8 bilyones.

Apan si Konsehal Margarita “Margot” Osmeña nga maoy tsirman sa committee on budget and finance sa Cebu City Council mipasabot nga wala nila giibanan ang gisugyot nga gahin sa mayor nga nagkantidad og P720 milyones para sa cash assistance sa mga senior.

Si kanhi mayor Tomas Osmeña nagtoo nga ang tinuoray’ng rason ni Rama sa pag-iban sa kantidad sa cash assistance para sa senior citizens mao nga ang dakbayan sa Sugbo kuwang g’yud og kwarta.

“Ang rason ana mao nga wala g’yuy kwarta ang siyudad,” matud ni Osmeña.

Daghan ang mga senior citizens nga nakurat sa pagkasayud ug nasagmuyo sa maong balita.

Si Carlo Dugaduga nga tigpamaba ni Mayor Rama miingon nga samtang P6,000 ang ihatag nga cash assistance ang laing P6,000 ihatag sa mga senior citizens pinaagi sa “ubang mga butang” sama sa libre nga tambal.

Apan si Konsehal Osmeña mitataw nga ang Appropriation Ordinance nga gipirmahan na gani ni Rama kaniadtong Disyembre 27, naglatid g’yud nga ang P720 milyones nga budget alang sa mga senior para kini sa ilang cash assistance.

Ang dakbayan sa Sugbo wala pa makahatag sa kinatibuk-an nga P10,000 sa matag senior citizens sa miaging tuig. (BANAT NEWS)