Seguridad sa Sinulog 2014 gipangandaman na sa Pro7

CEBU, Philippines - Nakigtigom ang Regional Director sa Police Regional Office-7 Chief Supt. Danilo Constantino sa mga lider sa Muslim Communities sa Metro Cebu kagahapong adlawa aron magpatabang sa pagpalig-on sa security measures nga ipatuman sa kapolisan sa umaabot nga Sinulog.

“Yung support nila nuon tuloy-tuloy ngayon, ang pagtitiwala nila noon tuloy-tuloy ngayon,” sumala pa ni Constantino.

Matud pa ni Hadji Hamsa Badio ang Presidente sa Lapu-Lapu Muslim Association nga dili sila gusto nga dunay mahitabo sa Kabisay-an kay sila unya ang mabutang sa “alanganin.”

Sumala ni Badio nga gitawag na nila ilang kaugalingon nga mga Sugboanon tungod kay dinhi na man sila nanimuyo ug mipasalig siya nga kun duna sila’y makita nga kadudahang tawo sa ilang komunidad ila gilayon kining itaho sa kapolisan.

Gipaabot nga mas modaghan ang mga tawo nga modagsa sa Sinulog karon subay sa obserbasyon sa nangaging katuigan nga nagkadaghan ang dumuduong sa maong kasaulogan. Dos mil ka mga polis ang i-deploy lakip na niini kapolisan nga abagan usab sa Central Command matud pa ni Constantino.

Sa iyang bahin ang hepe sa Regional Intelligence Division sa PRO-7, Supt. Paul Labra miingon nga wala sila’y na-monitor sa iyang opisina nga mga grupo nga posibling momugna og kagubot sa umaabot nga Sinulog. (/EIM)(BANAT NEWS)