Sikyu nangayo’g pasaylo
CEBU, Philippines - Midanguyngoy nga nangayo og pasaylo kagahapong adlawa ang gwardiya nga si Berly Tudtud ngadto sa pamilya sa mga napatay niya ilabi na sa accounting clerk nga si Jenelyn Megabon nga matud niya mura na niya’g igsuon.
Si Tudtud nga gipresentar ngadto sa buhatan ni Gob. Hilario Davide III uban sa mga sakop sa media mibutyag nga dili gyud unta niya intensyon ang pagpatay ug pagtulis apan naglibog na siya kun unsa ang iyang buhaton niadtong higayona.
“Wa gyud na nako gituyo, tungod sa kalisod…unsaon nako pagpang-apply og trabaho kung wa ko’y kwarta, wa gyud tuyoa ang pagpatay, mangayo ko’g pasaylo sa hingtungdan,†sumala pa ni Tudtud.
Sumala pa ni Tudtud nga nasurpresa siya nga gi-terminate siya sa bangko ug wa pa gyud ihatag ang iyang kataposang sweldo sa ilang security agency.
Matud pa ni Tudtud, kaduha lang siya nakapabuto ug iyang giangkon nga gituyo gyud niya pagpusil ang kapuyo ni Dean Desierto, 26, nga si Cecilia Torre, 30 ug napagan lang si Megabon.
“Kaduha ko nakapabuto, si Jenelyn naa man dapit ni Desierto, kung kahibalo ko nga naa si Jenelyn di ko ‘to buhaton,†sumala pa ni Tudtud.
Matud pa ni Tudtud nga human sa maong hitabo midagan siya sa Dakit sa dakbayan sa Bogo ug didto iyang ilubong ang iyang armas ug ang iyang kwarta nga nakuha ug mikuha lang siya og P10 ngadto sa P12 mil niini.
Mibiyahe dayon siya padung sa Negros agi sa Toledo City.
Ang Regional Director sa Police Regional Office 7 Chief Supt. Danilo Constantino miingon nga hatagan niya og pasidungog ang team nga mi follow-up sa maong kaso nga gipangulohan ni Sr. Insp Wilson Abot. (/EIM)(BANAT NEWS)
- Latest
