Nanginhas nalumos kay di makamaong molangoy

CEBU, Philippines - Patay na dihang nahidangat sa tambalanan ang usa ka lalaki nga nalumos samtang naligo sa dagat human manginhas pasado alas 11 sa buntag sa miaging adlaw sa barangay Malhiao sa lungsod sa Badian.

Ang nalumos naila nga si Jeffrey Teseo, 18, molupyo sa sitio Ginatinalonan, barangay Malhiao sa lungsod sa Badian.

Matud pa sa taho sa kapolisan nga ang biktima kuyog sa iyang maguwang nga si Noel ug sa ilang manghod nga menor nga nanginhas sa nahisgotang lugar ug nagkasinabot ang managsuon nga mangaligo sa dagat human sila manginhas.

Apan dihang nangaligo na sila sa dagat wala na sila kabantay nga mikalit lang og kalawom ang dagat hinungdan nga naglumbaanay ang managsuon og kapyot sa usa ka sakayan.

Tungod kay di makamaong molangoy ang maguwang ug kamanghuran lang ang nakaabot sa sakayan hinungdan nga nalumos.

Matud pa nga miunlod ang biktima sa dagat ug kalit lang kini nga nahanaw hinungdan nga nagpakitabang ang managsuon sa mga silingan niini nga naa sa baybayon.

Human mahaw-as sa dagat, daling gidala ang biktima sa Badian District Hospital apan patay na kini.  (BANAT NEWS)