Pinoy wa nay visa kun moadto’g Myanmar

CEBU, Philippines - Dili na kinahanglanon sa mga Filipino  ang visa kun  mobiyahe ngadto sa Myanmar sugod niining buwan sa Enero 2014.

Ang Philippine Information Agency (PIA) miingon  nga gipasalig  sa Department of Foreign Affairs (DFA), nga mahimo nang mosulod sa Myanmar ang mga Pinoy pinaagi sa ordinaryong pasaporte lang.

Balido  kini    sulod sa 14 ka adlaw nga  pag-estar  nila  didto sugod kagahapon, Enero 4, 2014.

Kini tungod kay matud  sa  PIA  nga sa maong petsa mahimong epektibo na ang kasabotan sa gobyerno sa Pilipinas ug Myanmar kalabot sa visa exemption.

Disyembre 5 sa miaging tuig sa dihang gilagdaan ang maong kasabotan sa pagbisita ni Myanmar President U Thein Sein dinhi sa nasud.

Gipaabot nga mas molambo pa ang turismo ug negosyo sa duha  ka nasud pinaagi sa maong visa-free entry agreement. (BANAT NEWS)