Kaso batok sa duha ka suspek pagpatay kang PO1 Unabia gipasaka na sa piskalya
CEBU, Philippines - Nag-atubang og kasong kriminal ang duha ka lalaki sa korte kinsa giingong kakunsabo sa pagpatay kang PO1 Felicisimo Unabia, Jr. niadtong Disyembre 11, 2013.
Kini human nakakita og igong basehan si state prosecutor Richard Abangan, Sr. nga pasakaan og kaso sila si Marvin Binoya, 31, ug Juanito Linggatong, 38, pulos taga barangay Cambuntan-Bolinawan, Carcar City sa pagpatay kang Unabia.
Matud ni Abangan nga ang mga suspetsado positibong gitumbok nga may kalambigitan gyud sa pagpatay sa maong polis base sa nakuhang footages sa close-circuit television camera diha sa crime scene.
Si Unabia gipusil patay sa alas 8:40 a.m. samtang naghuwat og bus padung Cebu City diha sa national highway sa J.P. Rizal St., sa barangay Poblacion, Carcar City aron mo-duty.
Ang biktima nakahiagum og samad pinusilan sa iyang tiyan, dughan ug suwang nga miresulta sa iyang kamatayon.
Matod sa witnesses nga si Binoya maoy driver sa getaway motorcycle samtang si Linggatong maoy lookout.
Ang kaliwat ni Unabia nga sila si Eddie ug Ricky nagkanayon nga samtang didto sila sa manokan sa biktima nakadungog sila’g buto ug sa ilang pagsubay dunay mipahibalo nila nga gipusil si Unabia ug namatay na kini.
Pagka-ugma, matod ni Eddie ug Ricky nga miadto sila sa Carcar City Police Station aron ma-verify ang footages nga nakuha sa close-circuit television camera. Didto ilang giila si Linggatong, Binoya ug ang giingong gunman nga naila sa pangalang Andoy Duterte.
Si Duterte padayon pang gipangita apan giapil sa gipasakaan og kaso, matud pa nga ilaha rang silingan ang maong mga suspek. (BANAT NEWS)
- Latest
