Bag-ong merkado inay bag-ong city hall ang ipatukod ni Cortes

CEBU, Philippines - Paninguhaon ni Mandaue City Mayor Jonas Cortes nga mahuman karong tuiga ang bag-ong edipisyo nga tukuron sa karaang merkado publiko sa dakbayan sa Mandaue inay magtukod og bag-ong city hall.

Matud pa ni Cortes, ang gahin sa tukuron nga bag-ong city hall sa dakbayan maoy ilang i-divert ngadto sa pagpatukod og bag-ong merkado nga anaa ipahimutang sa daan nga merkado sa Brgy. Guizo nga nasunog sa milabay’ng katuigan.

Gumikan sa grabeng liki sa merkado luyo sa Mandaue City Sports Complex sa barangay Centro atol sa 7.2 magnitude nga linog sa milabay’ng tuig dili na kini mapahimuslan pa hinungdan nga kinahanglan na kining abandonahon.

Ang hukom ni Cortes nakahatag og kalipay sa mga vendors ug mga parokyano sa dakbayan sa Mandaue diin matod pa nila dili na sila mabalaka sa ilang seguridad sa pagtabok sa highway padung sa merkado nga delikado sa mga sakyanan.

Ang mga vendors nalipay usab kay mobalik na unya ang ilang maayong kinitaan nga wala nila matagamtami sa gibalhinan nilang merkado.

Matud pa ni Cortes mas unahon niya ang katukoran sa merkado kay salikwaot kaayo nga dunay bag-ong city hall ang dakbayan sa Mandaue apan walay merkado publiko alang sa katawhan.

Giawhag karon ni Cortes nga mahatagan og pagtagad sa konseho sa dakbayan ang lakang sa pag-divert sa gahin sa tukorong bag-ong city hall ngadto sa katukoran sa bag-ong merkado.(/EIM)(BANAT NEWS)