MSYF nang-apud og balor P15mil nga housing materials sa Medellin

CEBU, Philippines - Nagsugod na pagpang apod-apod og mga gamit sa pagpatukod og panimalay ang Mariquita Salimbangon-Yeung Charitable Foundation Inc. (MSYCFI) ngadto sa mga biktima sa bagyong Yolanda sa amihanang bahin sa lalawigan sa Sugbo.

Kagahapon, sila si Jewel Yeung, presidente sa MSYCFI ug Martin Yeung, presidente sa MSY Holdings kauban sa asawa nga si Claudia, ang nangulo sa pagpang apod-apod sa Barangay Curva, Medellin.

Sila si Kong. Benhur Salimbangon ug Medellin Mayor Ricardo Ramirez ang nidawat sa mga gamit nga alang sa 245 ka pamilya.

Matag pamilya makadawat og 10 ka palid nga sin para atop, 20 ka plego nga marine plywood, coco lumbers, pintal, lansang ug sira sa pultahan nga mobalor og P15,000 ang tanan kada pamilya.

Matud pang Kong. Salimbangon nga magpadayon ang MSYCFI sa pagpang apod-apod hangtud gikinahanglan.

Ang makadawat gipili hinuon, kadto lang mga pamilya nga dunay mga bata ug mga tiguwang nga naguba gyud ang tibuok panimalay.

Liboan ka pamilya ang nawagtangan sa ilang pinuy-anan sa amihanang bahin sa Sugbu ilabi na sa ikaupat nga distrito sa lalawigan sa Sugbo human sa bagyong Yolanda niadtong Nobiyembre 8 sa nakalabay’ng tuig.

Matud pa ni Kong. Salimbangon nga sila ang nagrekomendar sa mga pangan sa hatagan apan ang MSYCFI maoy nipili kung kinsa ang hatagan subay sa maong criteria.

Unang nang apod-apod ang MSYCFI sa samang gamit sa pagpatukod sa balay sa 110 ka pamilya sa isla sa Malapascua sa lungsod sa Daanbantayan niadtong Disyembre. -/EIM (BANAT NEWS)