Botika gitulis, sikyu gipusil
CEBU, Philippines - Naangol ang usa ka security guard human kini gipusil sa tulisan nga mitulis sa La Nueva Pharmacy nga iyang gibantayan sa barangay Basak, Pardo, dakbayan sa Sugbo.
Ang maong insidente nahitabo mga alas 4:00 sa hapon atol niadtong bisperas sa Bag-ong Tuig o Disyembre 31, 2013.
Ang nahisgutang security guard mao si Santiago Martinez, 47-anyos taga sitio Alaska, barangay Mambaling dakbayan sa Sugbo nakaangkon og usa ka samad pinusilan sa walang bahin sa iyang paa daling gidala ngadto sa tambalanan.
Gidala usab sa duha ka wala mailhing tulisan ang kalibre .38 revolver nga service firearm ni Martinez.
Si SPO2 Bestilio Dabatos, duty desk officer sa Pardo Police Station mibutyag sa Banat News nga base sa imbestigasyon pinangulohan ni SPO3 Roger Nedamo, ang nahisgutang mga tulisan armado og kalibre .45 nga pistola sakay sa usa ka kolor blue nga L2 nga motorsiklo kalit nga nanulod sa botika ug usa kanila ang mition og pusil ngadto kang Martinez.
Si Martinez misuway kini og ibot sa iyang service firearm apan giunhan og pusil sa tulisan, dihang natumba kini gikuha sa laing tulisan ang armas niini ug gigamit usab pagtion sa kaherang si Jennifer Fuentes, 31, ug mimando nga ablihan ang drawer sa kaha. Gikuha sa mga tulisan ang P75 mil nga halin sa botika.
Gawas niini giingong ang mga tulisan misuway og abli sa vault sa botika pinaagi sa pagpusil sa padlock apan napakyas kini. Gitangtang ug gidala sa mga tulisan ang DVR hard drive sa Close Circuit Television (CCTV) camera sa botika.
Ang mga tulisan giingong mipasidaan kini sa mga kostumer nga dili magsaba dayon mibiya sakay sa ilang motorsiklo paingon ngadto sa barangay Bulacao, dakbayan sa Sugbo. Ang kapolisan nagpahigayon og follow-up operation sa maong hitabo. -/EIM (BANAT NEWS)
- Latest
