Abi og nakatulog lang, nabulit na diay og pinusilan sa lawas
CEBU, Philippines - Usa ka 39 anyos nga lalaki ang nakit-ang patay ug nabulit sa samad pinusilan sa lawas sa Barangay Budbod, Barili sa miaging udto.
Si Adriano Villegas nakaangkon og samad pinusilan sa dughan, tiyan ug walang batiis human pusila sa wala pa hiilhing mamumuno nga maoy hinungdan sa hinanaling kamatayon niini.
Si PO2 Florentino Cuadero, desk officer sa Barili Police Station, mibutyag nga si Adriano nakit-an sa iyang igsuon nga si Domingo Villegas mga alas 7:00 sa buntag nga nag-ubo sa yuta.
Huna-huna sa igsuon nga natulog lang ang biktima, iya lang kining gilabyan unya milakaw.
Nianang pagka-alas 11:00 sa buntag nabalik si Domingo apan nahibulong kini kay mao lang gihapon ang porma sa biktima hinungdan nga gisibog niya kini aron pukawon apan nakurat na lang kini sa dihang duna nay lama sa dugo sa lawas sa igsuon.
Wa pay matumbok nga mamumuno ug motibo ang kapolisan sa maong pagpatay. -/EIM (BANAT NEWS)
- Latest
