Daygon contest sa Mandaue malampuson

CEBU, Philippines -  Malampuson ug mabulokon ang gipasiugdahang indigay sa daygon sa kagamhanan sa dakbayan sa Mandaue nga gipahigayon sa heritage plaza  sa miaging  gabii.

Ang  maong  kalihukan   gitambongan sa mga molupyo   nga gikan sa nagkalainlaing kabarangayan sa maong  dakbayan.

Ang  mananaug  sa maong  indigay  mao ang Our Lady of Fatima Choir sa barangay Centro sa maong dakbayan. Gumikan sa maong kadaugan ilang nadawat ang ganti nga  P20,000 gawas sa tropeyo.     

Ang ikaduhang ganti  nga P15,000  nadawat  sa   The Nativity of Mary Chorale sa barangay Canduman .

Samtang ang ikatulong mananaug mao  ang Cambaro Musical Society sa barangay Cambaro sa maong dakbayan ug naangkon nila ang P10,000  nga ganting salapi.

Ang pagpasiugda og daygon contest sa kagamhanan sa maong dakbayan  nahimo lamang kabahin sa mga kalingawan nga makita sa matag gabii sa mosuroy nga mga  langyaw  ug  mga  bisita  gikan sa  nagkalainlaing  lugar  ug  labaw  sa tanan  sa  mga  Mandauehanon. Ang maong daygon contest nahimo  nga malampuson bisan pa man kun daghan  ang nag-ingon nga dako kaayo ang epekto sa pagsaulog sa Pasko karong tuiga.

Dugang pa nila nga  sa pagsaulog sa  miaging  Bag-ong Tuig  gipaabot  sa kadaghanan  ang  labing  debuenas  nga  tuig 2014. Hinuon  gumikan sa maong  mga  makalingaw  nga  kalihukan nakalimtan  sa kadaghanan  ang  mga  katalagman  sama  sa milabay  nga linog  nga  may  gikusgong 7.2 magnitude  ug  super typhoon  Yolanda. (BANAT NEWS)