Dili babag sa ABC President sa Cebu City ang political affiliation

CEBU, Philippines -  Ang bag-ong presidente sa Association of Barangay Captains (ABC) dinhi sa dakbayan sa Sugbo malaumon nga mahiusa niya ang tanang kapitan sa kabarangayan ug nga maayo usab siya’g relasyon sa mga kauban niya sa Cebu City Council. Si Tisa Barangay Captain Philip Zafra miluwat sa mao nga pamahayag tungod kay karong buwan sa Enero mosugod na siya paglingkod isip ex-officio member sa City Council nga magrepresentar sa mga opisyal sa barangay.

Matud ni Zafra nga bisan og duha ka grupo ang gipasilongan sa mga opisyal sa barangay sa dakbayan sa Sugbo apan sigurado siya nga silang tanan iyang mahiusa pinaagi sa paghatag kanila og patas nga pagtagad.

Sa 80 ka kapitan sa barangay dinhi sa dakbayan, 53 ka kapitan ang mibotar nga si Zafra ang mamahimong presidente sa ABC samtang 25 na ang mipili sa kontra ni Zafra nga maoy kandidato sa Bando Osmeña Pundok-Kauswagan (BOPK). Ang duha ka kapitan wala motunga sa eleksyon.

Gipasalig ni Zafra nga patas siya nga mohatag og pagtagad ngadto sa panginahanglan sa mga kapitan bisan pa man og dili sila kaalyado og grupo nga mao ang Team Rama.

Iyang gitataw nga didto unya sa konseho sa dakbayan dili gihapon siya motan-aw og politika kay iyang suportahan ang bisan unsa nga mga lakang nga makahatag og benepisyo sa katawhan. Gipasalig ni Zafra nga atol sa iyang administrasyon sa pagdumala sa ABC awhagon niya ang mga kauban niya nga mga kapitan sa barangay nga ipatuman gayud ang balaud ilabi na batok sa mga mapahimuslanon.

Ang gipasabot ni Zafra nga dili siya motuyo lang gayud sa pakiglantugi sa mga kauban niya sa konseho tungod lang kay dili sila alyado og grupo. (BANAT NEWS)