Langyaw, polis ug minor naaksidente

CEBU, Philippines - Tungod sa kadangog sa dalan nabangga ang SUV nga gimaneho sa usa ka langyaw sa luyong bahin sa Librando Bus pasado alas 12 sa udto sa miaging adlaw.  Ang langyaw naila nga si Helmuth Johann Polle, 68, kasamtangang nagpuyo sa barangay Basdiot sa lungsod sa Moalboal.

Samtang ang drayber sa bus naila nga si Joel Ramos Verano, 29, molupyo sa lungsod sa Badian. Wa hinuoy nangaangol kanila ug sa mga pasahero sa bus. Base sa imbestigasyon sa kapolisan nga nagsunod si Polle sa bus ug tungod sa kadangog sa dalan nawad-an kini sa iyang kontrol hinungdan nga nabangga ang SUV nga iyang gimaneho sa luyo sa bus.

Samtang naangol si PO2 Nilo Branzuela  dihang nabunal sa karsada human kini nakaligis og iro sa sitio Baha-baha, barangay Poblacion sa lungsod sa Argao. Si Branzuela nadestino sa Argao Police Station ug padung unta sa barangay Casay dihang nahitabo ang aksidente.

Nakaangkon og kadaot sa iyang ulo ug lawas ang biktima nga daling gidala ngadto sa Isidro C. Kintanar Memorial Hospital apan dali kining gibalhin sa South General Hospital.

Sa laing bahin, angol ang usa ka menor nga nagmaneho sa usa ka motor human kini masarasay sa dalan ug natumba tungod sa kakusog sa iyang dagan sa barangay Basdiot sa lungsod sa Moalboal pasado alas dose sa tungang gabii sa miaging adlaw.

Ang naangol mao si Rubiraf Vrooni, 17,  taga Basdiot, Moalboal ug walay lisensya sa pagmaneho. Ang biktima nakaangkon og grabing kadaot sa iyang walang tiil ug daling gidala sa kapolisan sa maong lungsod sa dakbayan sa Sugbo aron matambalan. (/EIM)(BANAT NEWS)