Ang balaod sa PhilHealth gipasabot

CEBU, Philippines - Aron masiguro nga ang tanang miyembro makabenepisyo gayud, ang PhilHealth nagkinahanglan lamang og dili mominus tulo ka bulan nga kontribusyon  sa dili pa ang confinement.

Sa miaging mga adlaw, ang mga miyembro nga indibidwal, gikinahanglan nga mobayad lamang sulod sa dili mominus siyam ka bulan  sa dili pa operahan  sa mga dagkong  balatian sama  sa cancer, dialysis ug mga kaso sa pagsabak.

Apan subay sa Implementing Rules and Regulations (IRR) sa National Health Insurance Act of 2013, ang mga miyembro lakip na sa ilang mga dependents may katungod na sa mga benepisyo sa PhilHealth kung ila lamang gayud nga gituman ang pagbayad sa premium  sa dili mominus tulo ka bulan sulod sa unom ka bulan sa dili  pa  ang  unang adlaw sa availment.

Ang mga miyembro gihatagan usab og higayon sa pagbayad sa kinatibuk-an nga  premium alang sa calendar year kung pananglit  dili gayud mabayaran  ang  gikinahanglang  unang  bayranan.

Kini naglangkob niadtong mga empleyado nga walay kita sa mga partikular nga bulan sama niadtong on-leave without pay o extended leave ug usab mga miyembro nga nakatrabaho  nga  dili  permanente.

Kadtong mga wala nay trabaho o  isip Overseas Filipino Worker (OFW) kansang  kontrata natapos na, lakip na niadtong mga miyembro nga wala makabayad sa premium nga kontribusyon mahimong mopili sa pagbayad   sa mga bulan sulod sa gitawag  nga applicable nga tuig.

Aron makapahimus  sa mga benepisyo sa PhilHealth, ang premium nga bayranan himoon sa dili pa ang petsa sa paggawas gikan sa hospital. (/WC)(BANAT NEWS)