Panimalay girakrakan, love triangle gisubay

CEBU, Philippines - Love triangle ang gituohang motibo nganong gipaulanan og bala sa tulo ka lalaki ang usa ka pamilyahan sa barangay Malolos sa lungsod sa Barili alas 5:30 sa miaging buntag.

Ang biktima naila nga sila si Randy Llanes , Eunice Llanes, Lelet Llanes ug Minerva Llanes.

Matud pa ni PO3 Jorje Timagos, desk officer sa Barili Police Station nga nahinabi sa Banat News nga duha pa lang ka suspetsado ang ilang nailhan nga sila si Heldo Basera, taga barangay Malolos ug si Bonifacio Jimenez alyas Junior molupyo sa barangay Cabcaban sa samang lungsod.

Sumala pa ni Timagos nga alas 5:30 sa buntag ang mga suspetsado mipwesto 15 metros gikan sa balay sa mga Llanes  ug gisangpit ang mga ngalan sa mga tawo diha sa sulod sa balay.

Human niadto girakrakan dayon ang balay ni Randy hinungdan nga mikaratil og dagan ang mga biktima ug swerteng walay bisan usa nga nangaigo kanila.

Matud pa sa kapolisan nga love triangle ang ilang gitutokan tungod kay ang asawa ni Randy ug si Bonifacio gidudahang adunay relasyon. Ug atol sa pagkahitabo, giingong nag-open forum ang banay’ng Llanes kabahin sa maong problema.

Giingong ang inahan mismo ni Randy ug igsuon maoy nakasakop kang Bonifacio nga diha sa balay sa magtiayon niadtong alas-10 sa gabii sa Disyembre 26 samtang wala diha si Randy. Bugtong ang nabilin ang asawa niini nga si Eunice ug ang ilang 3-anyos nga anak. Si Bonifacio matud pa daling nakalayat sa bintana.

Pasakaan og kasong multiple attempted murder ang duha ka suspetsado ug ang usa nila ka wala pa mailhing kauban. (/EIM)(BANAT NEWS)