Dengue tutokan sa Enero 2014 sa Cebu City Council

CEBU, Philippines - Sugod karong Enero ang Cebu City Council mobalik na sa pagtan-aw sa mga kaso sa dengue dinhi sa dakbayan nga sa milabay’ng mga buwan ingon sa nakalimtan na sa paghikutar.

Si Vice Mayor Edgardo Labella mipadala na og suwat ni Konsehal Lea Ouano-Japson nga nag-awhag sa paghatag na og senemana nga report kabahin sa dengue atul sa ilang sesyon.

Si Japson maoy tsirman sa Committee on Health and Hospital Services maoy rason nga siya ang giawhag ni Labella nga mohatag og report sa kaubanan niya sa konseho.

Nagtoo si Labella nga tungod sa sunod-sunod nga mga dagkung panghitabo sa dakbayan sama sa pag-igo sa linog, pagsirado sa Cebu City Medical Center (CCMC), pag-igo sa bagyo nga Yolanda ug uban pa mao nga nataligam-an na ang isyu sa dengue.

Nahibaw-an hinoon nga minus ra ang gidaghanon sa mga tawo nga namatay niining tuiga kun itandi sa tuig 2012, apan si Durinda Macasocol sa City Epidemiology Statistics and Surveillance Unit wala pa makahatag og tukma nga gidaghanon.

Matud ni Labella nga mahinungdanon nga masayud ang mga konsehal sa kalamboan sa kampanya batok sa dengue aron makahimo kini og lakang pag-alkontra sa sakit.

Sa pagsuroy-suroy ni Labella sa lainlaing mga barangay iyang nasayran nga adunay daghang mga natakboyan og dengue apan wala na lang ma-report sa City Health ngadto sa City Hall.  (BANAT NEWS)