Disgrasya sa sakyanan 1 patay, 5 angol

CEBU, Philippines - Usa ang patay ug lima ang angol lakip na sa duha ka menor sa karambola sa upat ka sakyanan sa National Highway sa Barangay Libjo sa lungsod sa Tabogon pasado alas 2:00   sa miaging hapon.

Patay diha-diha si Loreto Armero, 41, molupyo sa barangay Goyong sa lungsod sa  Borbon nga nakaangkon og grabeng kadaot sa iyang lawas human malabay sa iyang gisakyan ug nabangil sa ligid   kay  naligsan sa nagsunod nga sakyanan.

Samtang naangol sila si Mar-in Mondero, 20, Geralda Mondero, 54, ug ang duha ka menor, ang lima molupyo sa Barangay Goyong sakay sa Rusco Suzuki pick-up type nga multicab (YHK 517) nga gimaneho ni Inocentes Mondero, sa Barangay Don Gregorio Antigua.

Angol usab si Lester Idaño, 21, molupyo sa Barangay Hagnaya sa San Remigio nga pasahero sa Ceres bus (FVZ 127) nga gimaneho ni Arnel Tul-id, sa Barangay Caduawan sa lungsod sa Tabogon. Si Insp. Welther Grapa, ang hepe sa Tabogon Police Station  nga nahinabi sa Banat News miingon nga may usa ka Toyota Corolla Sedan (GHT 304) nga gimaneho ni Guillermo Bunjag, molupyo sa Barangay Pit-os sa dakbayan sa Sugbo.

Matud pa nga didto sa maong lugar ang sakyanan tungod kay nanghatag kini og relief goods sa mga molupyo sa Barangay Libjo nga naapektohan sa bagyong Yolanda.

 Sumala pa nga ang multicab nga giluwanan sa upat ka mga biktima nagdagan padulong sa dakbayan sa Bogo ug gisundan usab kini sa usa ka Fuzo Fighter close van (GNC 910) nga gimaneho ni Melvin Andilab, 42, lumad nga taga-Pagadian City.

 Misulay unta pag-overtake ang van sa multicab sa kurbadahon nga dapit sa Barangay Libjo apan mi-preno kini tungod kay nakasugat man  og usa ka Ceres Bus.

Matud pa nga sa pag-iway sa maong van naigo niya ang multicab hinungdan sa pagkatagak ug pagkamatay ni Armero kay  naligsan  sa van.

Midugang  si Grapa nga nasaghiran pa gyud sa van ang Ceres Bus nga iyang gikasugat.

Sumala pa ni Grapa nga ang drayber sa van  maoy sad-an sa maong aksidente tungod kay siya man ang midasmag sa multicab. 

 Kasamtangang gitanggong sa Tabogon Police Station ang drayber sa van samtang naghulat pa sa tukmang kaso nga ipasaka batok kaniya. (BANAT NEWS)