Taga Labangon paadtuon sa opisina ni Poblete
CEBU, Philippines - Ang mga opisyal sa Barangay Labangon giawhag ni City Administrator Jose Marie Poblete nga moadto ra sa iyang opisina aron pagsulbad sa ilang problema sa paghakut sa mga basura.
Si Labangon Barangay Captain Victor Buendia mipadala og suwat-reklamo ngadto sa Ombudsman Visayas kay matud pa wala hakuta sa mga sakop sa Department of Public Services (DPS) ang ilang mga basura.
Matud ni Buendia nga samtang adunay trak sa basura ang Barangay Labangon apan kuwang sila og konsumo sa fuel nga magamit kay wala sila hatagi sa City Hall og fuel assistance.
Si Poblete mipasabot nga ang pagputol sa paghatag og konsumo sa krudo o gasolina sa Labangon nagsugod kini dihang ang City Council miaprobar og ordinansa nga ang pahatagan og gasolina mao na lang kadtong mga sakyanan nga iya sa City Hall.
Matud ni Poblete nga sanglit ang garbage truck sa Labangon gipanag-iya man sa barangay wala na kini makakuha og fuel assistance sa City Hall.
Apan matud ni Poblete nga bisan og adunay ordinansa nga nagdili paghatag og suplay nga gasolina sa mga sakyanan nga dili iya sa City Hall, padayon sila nga mohatag.
Dugang ni Poblete nga ang himoon sa mga opisyal sa Labangon mao ra ang pag-adto sa City Hall aron mahatagan kini og pagtugot nga makakuha og gasolina ug krudo.
Gibutyag ni Poblete nga ang ubang opisyal sa City Hall mahadlok na mamirma og Request Issue Voucher (RIV) kay basin makiha sila apan girisgo niya ang iyang kaugalingon tungod sa public service. (BANAT NEWS)
- Latest
