Mga tawo wa nay gana sa pabuto

CEBU, Philippines - Subsub nga kampanya batok sa pabuto ug krisis  sa kuwarta maoy  hinungdan nga minus ang biktima sa pabuto sa dakbayan sa Lapu-Lapu.

Matud pa ni Lapu-Lapu City Police Office Director P/SSupt. Rey Lyndon Lawas ug Lapu-Lapu City Fire Marshal F/Supt. Oscar Mayol ang ilang subsub nga pagpahimangno sa katawhan sa dautang epekto sa pagpabuto ug ang hugot nga pagmonitor sa mga namaligya niini hinungdan nga minus ang nabiktima niini karon kung itandi sa milabay’ng tuig.

Base sa talaan sa mga tambalanan sa dakbayan sa Lapu-Lapu tulo lamang ka biktima sa pabuto diin duha niini ang 7 anyos ug usa ang 15 anyos nga nakaangkon lamang og mga paso sa ilang kamot    itandi sa 4 ka biktima sa pabuto sa milabay’ng tuig 2012.

Nanghinaut si Supt. Mayol nga dili mosaka ang gidaghanon sa biktima sa pabuto sa umaabot nga pagsugat sa Bag-ong Tuig.

Sa pagmonitor sa kapolisan sa illegal nga namaligya og pabuto mokabat sa P500 nga balor sa pabuto ang ilang gisakmit sa usa ka tawo nga namaligya gawas sa fire cracker zone.

Nakita sa duha ka opisyal nga  ang krisis nga nasinati sa nasud nakapabugnaw  sa katawhan  pagpamalit  og  mga  butang  nga  walay  kapuslanan. (BANAT NEWS)