Duha ka crips namasko sa prisohan

CEBU, Philippines -  Didto  mamasko   sa sulod sa  bilanggoan ang duha ka sakop sa Crips gang kinsa  nasikop  sa kapolisan  human  patya  ang  kontra  niini  didto   sa barangay Polpogan, lungsod   sa Consolacion  sa  miaging Martes  sa gabii

Ang   mga suspetsado  mao sila si Danny Mar Navarro, alyas Bill, 22 ug Harold Sasing, 23 , nga pulos ulitawo ug nagpuyo sa barangay Nangka sa nahisgotang lungsod  ug  giila  nga  mga  sakop  sa Crips gang.

Si PO1 Albert Jiminez sa kapolisan sa nahisgotang lungsod  nga nahinabi sa Banat News miingon nga ang  mga dinakpan maoy  suspetsado sa pagpusil patay kang Reymar Racaza Dova, 19, ulitawo, nga taga Polpogan 1 sa barangay Polpogan,  sa nahisgotang lungsod.

Matud pa ni PO1 Jiminez nga  si Dova naglingkod   sa nag-parking  kauban sa tulo ka mga higalang batan-on nga sila si Bryan, Jessel ug Michael.

Nag-estoryahay  ang upat ka managhigala   sa  alas 12 sa tungang gabii sa bispiras  sa Pasko dihang kalit lang  miabot  ang duha ka mga suspetsado nga nagsakay og motorsiklo.

Didto  kini  mohunong   duol  sa  pundok  sa biktima ug  mga  kauban. Midugang  si PO1 Jiminez  nga  nanaug  dayon  ang angkas  nga si  Navarro  ug  milanit  sa iyang  armas  de fuego ug gipusil  ang  walang  dughan  sa biktima   ug  ang  paa  niini.

Matud pa ni PO1 Jiminez nga human sa maong pagpamusil   miikyas  dayon  ang  suspetsado  pinaagi  sa pagbalik  og  sakay  sa   motorsiklo   nga  kolor    pula.

Si PO1 Jiminez miingon nga gihatud  dayon  ang biktima sa Eversely Child Sanitarium Hospital  apan gideklarar kini sa mga doktor nga dead on arrival.

 Hinuon  ang mga nakasaksi   maoy  miila sa duha ka suspetsado hinungdan    nga  nasikop   dayon  sa kapolisan  ug  gibalhug  sa prisohan  sa maong  lungsod.  (BANAT NEWS)