Mga pasahero sa csbt nagsugod na og dasok
CEBU, Philippines - Mianam na og kadaghan ang mga pasahero sa South Bus Terminal sugod kagahapon, matud pa sa tagdumala niini nga si Vicente Dejoras.
Apan gibutyag niya nga otsenta porsiyento pa sila sa ilang pagpangandam sanglit nagkuwang pa man og mga tawo nga motabang sa pagbantay sa seguridad sulod sa terminal.
“Di pa gyud smooth ang dagan diri. Daghan pa gyud kaayong kakulian,†matud niya nga nahinabi sa Banat Manobela.
Dugang pa ni Dejoras nga miduso na siya og “written request†ngadto sa Tactical Security and Detective Agency niadto pang Lunes, apan hangtud kagahapon walay dugang gwardiya nga naabot.
“Hagbay ra mi nag-request. I don’t know if naasa ra ang request. Wa gyud hangtod karon ang ilang mga tawo (mga gwardiya),†sigon pa ni Dejoras.
“Gusto unta ko nga niadto pang Biyernes, 100 percent nga ready na unta mi,†dugang pa niya nga may dalang kasagmuyo.
Matud usab niya nga kagahapon sa hapon, adunay duha ka miyembro sa Philippine National Police kon PNP nga nagbantay sa lugar samtang upat ka tawo ang gipadala sa Civil and Security Unit sa probinsya sa Sugbo.
Sa pakighinabi sa Banat Manobela kang Admin officer Marilou Cagang sa Tactical Security and Detective Agency, kini mipadayag nga gipaningkamutan nila nga makapadala og mga tawo kagabii. Sugod kagabii hangtud na sa Disyembre 24 sa gabii gipaabot nga magdasok gyud ang mga pasahero sa Cebu South Bus Terminal gumikan sa mga mamauli aron makaapas sa pagsugat sa Pasko sa ilang tagsa-tagsa ka mga panimalay.
Samtang gipahimangnoan usab ni Dejoras ang mga pasahero nga magmabinantayon sa ilang mga butang kun anaa sa gawas sa terminal.
“Kung mahimo, ibutang sa ilang atubangan ang ilang knap sacks,†sigon pa niya human duna na sila’y upat ka mga natalang insidente sa pagpangabli og bag kagahapon pa lang sa buntag. Ang mga kasagarang mabiktima mao kadtong mga nagdali ug ang bag naa lang sa ilang likod, maong dili na kaayo nila mabantayan nga giablihan na ang ilang zipper sa bulsa gumikan sa pagduot-duot sa mga tawo. (BANAT NEWS)
- Latest
