Basillote hulipanan sa pagka-asst. majority floor leader

CEBU, Philippines - Si Talisay City Councilor Dennis Basillote posibleng hulipan isip assistant majority floor leader sa konseho sa Talisay human kini mitapon ngadto sa Liberal Party (LP).

Si Konsehal Richard Francis “Choy” Aznar, majority floor leader sa konseho sa dakbayan sa Talisay nagkanayon nga sa pagkakaron si Basillote pa gihapon ang assistant majority floor leader sa konseho.

Gibutyag ni Aznar  sa mga tigbalita nga ang grupo wala pa magkasabot bahin sa paghulip kang Basillote sa iyang posisyon.

Hinuon matud ni Aznar nga posibleng ibase sa seniority ang pagpili og ipuli kang Basillote ug mag-agad usab kini sa desisyon sa grupo kung kinsay piliong ihulip.

Si Basillote kinsa maoy chairman sa committee on education ug committee sa urban poor posibleng tangtangan usab  sa mao niyang gihuptan nga chairmanship.

Apan matud ni Aznar nga wala pa sila maghisgot  sa paghubo  kang  Basillote  sa  iyang  pagka-chairman  sa  duha  ka  komite  sa konseho.

Sayo  niini daan na  nga  nanabi  si  Basillote  nga  may  taga  Alayon  nga  mobalhin  ngadto   sa LP.

Human  panid-i  ni Aznar,  iyang  nasuta  nga way  laing  taga  Alayon  gawas  kang  Basillote nga  mitapon  sa LP.

Si Aznar nagkanayon nga sila karon sa Alayon nagpabiling lig-on bisan pa sa pagbalhin ni Basillote  sa LP.

Dugang ni Aznar nga posibleng sa sunod tuig mahisgutan ug madesisyonan na sa grupo ang  bahin sa ihulip  kang Basillote isip assistant majority floor leader.

Ang Banat News misuway og tawag sa mga numero sa cell phone ni Basillote aron makuhaan kini og pamahayag apan walay mitubag sa tawag. (BANAT NEWS)