Kaso batok sa driver sa naaksidenteng Ceres bus nasang-at na sa korte

CEBU, Philippines - Gipasaka na sa piskalya ang kasong kriminal batok sa driver sa Ceres Bus nga nalimbuwad ug mikalas sa kinabuhi sa asawa ug anak sa drayber niini diha sa barangay Balhaan sa lungsod sa Badian.

Ang piskalya misang-at sa kaso ngadto sa korte human makakita og igong basehan nga ipasaka ang kasong kalapasan sa Section 5 in relation to Section 12C of Republic Act 10586 otherwise known as Anti-Drunk and Drugged Driving Act of 2013.

Si state prosecutor Venice Balansag nagkanayon  nga si Erwin Gerson, 42, taga Wireless, Mandaue City miingon nga wala mo-file og counter-affidavit ang suspek ug mipadayag kining iyang atubangon ang sumbong diha sa korte.

Si Balansag mirekomendar og P40,000 bail alang sa temporaryong kagawasan ni Gerson.

Ang namatay sa maong aksidente mao ang asawa ni Gerson nga si Marilyn, 41, ug ang ilang anak nga si Geralyn,5, ug 32  usab ka tawo ang nangaangol.

Matod sa imbestigasyon sa kapulisan nga kusog ang dagan ni Gerson hinungdan nga nawad-an kini’g control diha sa Barangay Balhaan. Tungod niini mibangga sa kilometre post ang bus una pa kini natumba. Nasuta usab sa liquor test nga positibo kining nakainom og ilimnong makahubog. (BANAT NEWS)